अफगानिस्तान, ८ साउन २०७४। हालै अमेरिकामा आयोजित रोबोटिक्स प्रतियोगितामा पदक जित्ने अफगान बालिकालाई अफगानिस्तानका राष्ट्रपतिले बधाई दिनुभएको छ ।
यसै हप्ताको सुरुमा अमेरिकामा सो प्रतियोगिता भएको थियो । उक्त प्रतियोगिताका लागि अफगानिस्तानबाट ६ जना बालिका त्यहाँ सहभागि भएका थिए ।
सो प्रतियोगिताको गत मङ्गलबार भएको प्रतिश्पर्धामा अफगान बालिकाले रजत पदक जितेका थिए ।
विश्वका सय भन्दा बढी देशका बालिकाबीच भएको सो प्रतियोगितामा सहभागिताका लागि र पदकका लागि राष्ट्रपति असरफ घानीले बधाई ज्ञापन गर्नुभएको राष्ट्रपतिको कार्यालयद्धारा जारी विज्ञप्तिमा जनाइएको छ ।
यसअघि ती बालिकाले अमेरिका जाने प्रवेशाज्ञा नपाएकोले बालिकाले विशेष निवेदन लेखी अफगानिस्तानमा रहेको अमेरिकी दूतावासमा अनुरोध गरेपछि प्रवेशाज्ञा पाएका थिए ।
सो प्रतियोगितामा सिरियाका शरणार्थी बालिकाका साथै अमेरिकाले प्रवेशाज्ञा नदिने सूचीमा राखेका मुस्लिम देशका बालिकाहरु पनि रहेका थिए । सो प्रतियोगितामा उनीहरुको सहभागितालाई निकै आकर्षक रुपमा लिइएको थियो ।
Video source: Aljazeera
