काठमाडौँ, भाद्र २९ । अपि पावर कम्पनी लिमिटेडले आफ्नो ११औँ वार्षिक साधारणसभा शनिबार सम्पन्न गरेको छ । कम्पनीले ८.५ मेगावाट क्षमताको नौगड गाढ साना जलविद्युत् आयोजनाको निर्माण कार्य अन्तिम चरणमा पु¥याएको छ ।

    कम्पनीबाट उत्पादित विद्युत् नेपाल विद्युत् प्राधिकरणबाट निर्माणाधीन चमेलिया जलविद्युत् आयोजनाको बलाँच सवस्टेसनमा जडान गरिनेछ । उत्पादित विद्युत्बाट सुदूरपश्चिमको पहाडी जिल्लाहरूमा विद्युत् भार कटौती कम हुने विश्वास गरिएको छ ।

    कम्पनीमा हाल एक हजार नौजना संस्थापक सेयरधनी छन् । कम्पनीले २०७१ साल चैतभित्र विद्युत् उत्पादन गरी राष्ट्रिय ग्रिडमा जोड्ने लक्ष्यका साथ काम गरिरहेको छ ।

    कम्पनीले आफ्ना चुक्ता पुँजी रु १०० करोड पु¥याउने प्रस्तावसहित निकट भविष्यमा नै स्थानीय जनतालाई रु १० करोडको र सर्वसाधारणलाई रु २९.४ करोड बराबरको प्राथमिक सेयर निष्काशन (आइपिओ) गर्ने प्रस्ताव पारित गरेको छ ।

    कम्पनीले आठ मेगावाटको अपर नौगड गाढ र २४.५ मेगावाटको अपर चमेलिया आयोजनाको निर्माण कार्यसमेत अघि बढाउने योजना कम्पनीका अध्यक्ष गुरूप्रसाद न्यौपानेले साधारणसभामा पेस गर्नुभएको थियो । रासस

सुनसरी, भाद्र २९ । रिक्सा चालकहरू आज बिहानैदेखि इटहरीमा आन्दोलनमा उत्रिएका छन् ।  ब्याट्रीबाट चल्ने सिटी सफारी इटहरी नगरपालिकामा दर्ता भई सञ्चालन हुन थालेपछि रिक्सा चल्न छाडेको भन्दै त्यसको विरोधमा रिक्सा चालकहरूले विरोध जनाउँदै आएका छन् ।
    
इटहरी नगरपालिकाको सांस्कृतिक भवनमा शनिबार भएको रिक्सा चालक संगठनको अधिवेशनमा चालकहरूले सिटी सफारी सञ्चालनमा रोक लगाउने विषयमा जोडदार रूपमा आवाज उठाए पनि रिक्सा चालकहरूको युनियनले कुनै निर्णय नलिएपछि उनीहरू आन्दोलित भएका हुन् ।
    
रिक्सा चालकहरूले युनियनले गरेको कुनै पनि निर्णय मान्न नहुने बताएका छन् । सिटी सफारीलाई इटहरीबाट हटाई छाड्ने अठोटसहित उनीहरू बिहानैदेखि माइकिङ गर्दै बिहान १० बजेदेखि सडकमा लामबद्ध रिक्सा प्रदर्शन गरेर विरोधमा उत्रिएका छन् ।

इटहरी तथा आसपासका क्षेत्रमा झन्डै तीन हजारभन्दा बढी रिक्सा सञ्चालनमा रहेका छन् भने अहिले ब्याट्रीबाट चल्ने रिक्साको सङ्ख्या १०० भन्दा बढी पुगिसकेको छ । रासस

 विराटनगर, भाद्र २९ । सुनसरी र मोरङमा सञ्चालित चार वटा ग्यास उद्योगको नेपाल आयल निगम पूर्वाञ्चल क्षेत्रीय विराटनगरले अनुगमन गरेको छ । निगमका पूर्वाञ्चल क्षेत्रीय प्रमुख सीताराम पोखरेलको नेतृत्वमा खटिएको टोलीले कोसी ग्यास उद्योग, सुनसरीको सुविधा ग्यास उद्योग, प्रिमा ग्यास र कामख्या ग्यास उद्योगमा शनिबार अनुगमन गरेको थियो ।
    
    टोलीले ती ग्यास उद्योगको अवस्था, सुरक्षाको वातावरण, नापतौल यन्त्रको अवस्था, प्रदूषण नियन्त्रणका सम्बन्धमा गरिएका कार्य र म्याद नाघेका सिलिण्डर प्रयोगबारे अनुगमन गरेको थियो । टोलीमा गुणस्तर तथा नापतौल क्षेत्रीय कार्यालय विराटनगरका प्रमुख शशिभूषण यादव, वाणिज्य कार्यालय विराटनगरका प्रमुख नयराज नेपाल, उपभोक्ता संरक्षण मञ्चका मोहन भट्टराईलगायतका व्यक्तिहरूको सहभागिता रहेको थियो ।
    
    ग्यासको थोक तथा खुद्रा विक्रेताको अनुगमन पटक–पटक भए पनि ग्यास उद्योगको लामो समयदेखि अनुगमन नभएकाले उपभोक्ताको हितका लागि अनुगमन गरिएको आयल निगमका प्रमुख पोखरेलले बताउनुभयो । ती उद्योगले प्रतिदिन करिब दुई हजार ग्यास सिलिण्डर बजार बिक्री वितरणका लागि पठाउने गरेका छन् ।