नवलपरासी, भाद्र २५ । नवलपरासीको देउराली–३ गिरुबारीमा सञ्चालन भइरहेको ३०औँ युनाइटेड फुटबल कपको क्वाटर फाइनल खेलमा दुई समूहबीच झडप हुँदा तीन जना घाइते भएका छन् ।

चोरमारा र प्रगतिनगरबीच भइरहेको खेलको क्रममा प्रगतिनगरका समर्थकले अश्लिल शब्द प्रयोग गरेको भन्दै चोरमाराका समर्थकले प्रगतिनगरका युवासँग सामान्य भनाभन गरेका थिए । सामान्य भनाभनमै चोरमाराका समर्थकले हातपात सुरु गरेपछि सो झडप भएको हो ।

झडपमा परी घाइते हुनेमा प्रगतिनगरका ३० वर्षीय सुन्दर श्रेष्ठ, सरोज परियार र अमृत सुस्लिङ मगर रहेका छन् । घाइतेमध्ये श्रेष्ठको अवस्था गम्भीर रहेको बताइएको छ । उहाँको टाउकोमा गम्भीर चोट लागेको इलाका प्रहरी कार्यालय कावासोतीले जनाएको छ । घाइतेको अहिले भरतपुरमा उपचार भइरहेको प्रहरीले बताएको छ ।

झडपले ठूलोरुप लिएपछि स्थितिलाई नियन्त्रण गर्न प्रहरीले एक राउन्ड हवाई फायरसमेत गरेको इलाका प्रहरी कार्यालय कावासोतीका प्रहरी निरीक्षक कृष्णराज सापकोटाले जानकारी दिनुभयो । घटनामा संलग्न छ जना युवालाई नियन्त्रणमा लिई घटनाका बारेमा अनुसन्धान गरिरहेको प्रहरीले बताएको छ । रासस

अत्तरिया (कैलाली), २९ भदौ । सुदूरपश्चिमाञ्चल गोजुरियो कराँते दो सङ्घद्वारा आज यहाँ आयोजित छैटौँ अन्तर्राष्ट्रिय कराँते प्रतियोगिता सुरु भएको छ ।

स्वास्थ्य तथा जनसङ्ख्यामन्त्री खगराज अधिकारीले प्रतियोगिताको उद्घाटन गर्नुभयो । तीनदिने सो प्रतियोगितामा नेपाल, भारत, बङ्गलादेश र श्रीलङ्काका खेलाडीको सहभागिता रहेको सङ्घका अध्यक्ष नारदमुनि रानाले जानकारी दिनुभयो । रासस

काठमाडौँ, ७ असोज । दक्षिण कोरियाको इचोन सहरमा जारी १७औँ एसियाली खेलकुद प्रतियोगिताअन्तर्गत आज भएको पौडी खेलमा नेपाल पराजित भएको छ ।

पौडीअन्तर्गत पुरुषको ५० मिटर फ्रिस्टाइलमा नेपालका शिरीष गुरुङ र मिराज प्रजापतिले खासै राम्रो प्रदर्शन गर्न सकेनन् । गुरुङले निर्धारित दूरी २७ दशमलव २३ सेकेन्डमा पूरा गर्दै चौथो भए । उनले पुरानो कीर्तिमानमा ० दशमलव ०२ सेकेन्डले सुधार्ने मौका पाए ।

त्यस्तै, प्रजापति २८ दशमलव ०८ सेकेन्डमा निर्धारित दूरी सकाउँदै छैटौँ स्थानमा रहे । उनले आफ्नो पहिलेको व्यक्तिगत प्रदर्शनीलाई समेत भेटाउन सकेनन् । यसअघि प्रजापतिले २७ दशमलव २३ सेकेन्डमा दूरी पार गरेका थिए । यो स्पर्धामा चित्रबहादुर गुरुङको नाममा २६ दशमलव ३४ सेकेन्डको राष्ट्रिय कीर्तिमान छ ।

यही असोज ३ गतेदेखि सञ्चालन भएको उक्त प्रतियोगिताका २५ खेलमा सहभागिता जनाएको नेपालले अहिलेसम्म एउटा पनि पदक हात पार्न सकेको छैन । त्यस्तै, पदक तालिकामा चीन अहिलेसम्म २६ स्वर्णपदकका साथ ५८ पदक बटुल्दै शीर्ष स्थानमा छ ।

त्यस्तै, आयोजक दक्षिण कोरिया १४ स्वर्णसहित ४५ पदकका साथ दोस्रो स्थानमा छ । जापान १३ स्वर्णसहित ४२ पदकका साथ तेस्रो स्थानमा छ ।