चीन, २१ वैशाख २०७४। चीनको उत्तरी क्षेत्रमा पर्ने भित्री मङ्गोलीया स्वायत्त प्रदेशमा भएको डढेलो नियन्त्रण गर्न सात हजार सात सय जना लगातार प्रयासरत रहेका छन् ।
मङ्गलबारदेखि सुरु भएको डढेलो नियन्त्रण गर्न उनीहरुले बुधबार अबेरसम्म पनि प्रयास गरिरहेको अधिकारीहरुले जनाएका छन् । ग्रेटर हिङ्गन पहाडमा पर्ने बेइडाहे जङ्गलमा आगलागी भएको हो ।
मङ्गलबार बिहानसम्म सो जङ्गलको ५ हजार हेक्टर क्षेत्रमा आगलागी फैलिएको आगलागी नियन्त्रणसम्बन्धी क्षेत्रीय कार्यालयले जनाएको छ ।
सुख्खा वनस्पती, तीब्रगतिमा चलिरहेको परिवर्तनशील हावा, उच्च तापक्रम आदिका कारणले आगलागी नियन्त्रण गर्न कठिनाई भइरहेको आगलागी नियन्त्रणमा खटिएकाले बताएका छन् ।
आगो नियन्त्रणका लागि प्रदेश सरकारले अग्नी नियन्त्रक विमानहरु घटनास्थलमा पठाएको जनाएको छ ।
आगलागी भइरहेको प्रदेशको छिमेकी प्रदेश हेइलोङजिअङका झन्डै ६ सय अग्नी नियन्त्रक आगो निभाउन घटनास्थलतर्फ जाने तयारीमा रहेका छन् ।
अहिलेसम्म आगलागीका कारण स्पष्ट हुन नसकेको अधिकारीहरुले बताएका छन् । बसन्त ऋतुको बेला भित्री मङ्गोलीयामा अरू बेलाभन्दा बढी तापक्रम हुने भएकाले आगलागीको जोखिम पनि बढ्ने गरेको छ ।
सिमाना जोडिएको अर्को जङ्गलमा पनि गत आइतबार आगलागी भएको थियो । त्यो भने अहिले नियन्त्रणमा आइसकेको छ ।
